Եկեղեցին որբախնամ գործունեություն կիրականացնի
Այսօր Ամենայն Հայոց Կաթողիկոս Գարեգին Բ հանդիսապետությամբ տեղի է ունեցել Սուրբ Գայանե վանքում գտնվող Մայր Աթոռ Սուրբ Էջմիածնի մանկատան շենքի բացման արարողությունը: Շենքը հիմնովին վերանորոգվել է լոնդոնաբնակ Քյուրքչյան ընտանիքի բարերարությամբ` ի հիշատակ հոգելույս տիար Ջորջ Քյուրքչյանի և նրա դուստր Մարինա Քյուրքչյանի:
Մայր աթոռ սուրբ Էջմիածնի տեղեկատվական համակարգի հաղորդմամբ, Հայաստանյայց Առաքելական Սուրբ Եկեղեցու կողմից իրականացվող սոցիալական ծրագրերի շարքում մանկատան բացումը հերթական կարևոր ձեռնարկն է, որով Եկեղեցին որբախնամ գործունեություն կիրականացնի: Մանկատունը նախատեսված է կարիքավոր ընտանիքների և ծնողազուրկ 42 մանուկների և պատանիների համար, որոնք կուսանեն Մայր Աթոռ Սուրբ Էջմիածնի «Էօրնեկյան» հանրակրթական դպրոցում, կհաճախեն Էջմիածնի Հայորդյաց տուն: Քյուրքչյան ընտանիքը Մայր Աթոռի մանկատան շենքի հիմնանորոգությունից բացի ստանձնել է նաև մանկատան հետագա գործունեության հովանավորությունը:
Վեհափառ Հայրապետը, հրավիրելով ներկաներին աղոթք հնչեցնել բարերարի հոգու համար, նաև նշեց, որ որոշ ժամանակ անց այս հաստատությունից ներս ևս աղոթք պիտի բարձրանա առ Աստված Քյուրքչյան ընտանիքի համար, որը հայտնի է իր բարեգործ եկեղեցանվեր ոգով և շուրջ կես դար նվիրյալ կերպով, իր կարողություններով ու միջոցներով մշտապես զորավիգ է եղել Հայաստանյայց Առաքելական Սուրբ Եկեղեցուն և Մայր Աթոռ Սուրբ Էջմիածնին:
Այնուհետև Ամենայն Հայոց Կաթողիկոսը, Ջոն Քյուրքչյանը և Լոռա Քյուրքչյանը կտրել են շենքի մուտքի ժապավենը, ապա բարերարները և ներկաները ծանոթացել են շենքի պայմաններին:
Բացման արարողության ավարտին Սուրբ Գայանե վանքի գերեզմանատանը Մայր Աթոռի բարերարներ Սարգիս և Աստղիկ Քյուրքչյանների շիրիմների կողքին ամփոփվել է նրանց զավակի` Ջորջ Քյուրքչյանի աճյունասափորը: Կատարվել է հոգեհանգստյան կարգ:
Print version
Plain text
Comments (0 posted):
Post your comment