«ՀՀ ԿԳ նախարար Արմեն Աշոտյանը իր արձակուրդի մի մասն անցկացնում է Ջավախքում»
Font size:
«Միտք» վերլուծական կենտրոնը տարածել է հաղորդագրություն, որի մեջ նշել է, որ ՀՀ ԿԳ նախարար Արմեն Աշոտյանն այս օրերին Ջավախքում է. այցը կրում է ոչ թե պաշտոնական, այլ` մասնավոր, արձակուրդային բնույթ:
«ՀՀ կրթական գերատեսչության ղեկավարի այս քայլը, այն է` արձակուրդի մի քանի օրը գեղատեսիլ Ջավախքում անցկացնելը, մտավորականության, ուսուցիչների, գործիչների, Ջավախքի խնդրով մտահոգ մարդկանց և պարզապես հասարակության կողքին գտնվելը, կարելի է որակել մեկ նախադասությամբ` սրտացավություն հայրենական խնդիրների նկատմամբ:
Բազմիցս ենք շեշտել, որ ջավախահայությունը նաև ունի բարոյահոգեբանական մեծ աջակցության կարիք: Բազմիցս են հնչել մտահոգություններ, որ ՀՀ պետական պաշտոնական այրերը քիչ են այցելում տարածաշրջան, իսկ կատարված այցերի մեծ մասն էլ հիմնականում պաշտոնական բնույթի են, և հասարակ ժողովուրդը, բացի քաղաքավարի ժպիտներից, մեկ-երկու վայրկյան պաշտոնյաների դեմքերը նշմարելուց և մի շարք խոստումներից, ուրիշ բան չի տեսնում:
Ներկայումս նույնպես, ելնելով վրացական «անկոտրում» քաղաքականության դառը փորձից, դժվար է հավատալ, որ պարոն Աշոտյանի` Ջավախք այցելությունից հետո, հենց սեպտեմբերի մեկին տեղում կբացվի հայ-վրացական պետական բուհ, կավելացվեն հայոց լեզվի դասաժամերը, պետական ծրագրերի մեջ կներառվեն «հայոց պատմություն» կամ «Հայաստանի աշխարհագրություն» առարկաները, վերջապես` տարածաշրջանում հայերենը կստանա իրավական կարգավիճակ, սակայն մեկ բան հստակ կարող ենք ասել. առաջնահերթորեն և հրատապ է նախևառաջ վերականգնել ջավախահայության բարոյական գիտակցությունը և ազգային ոգին, դրանից հետո տեղի հասարակությունն ինքը կարող է շատ հարցեր լուծել: Ա. Աշոտյանի` շատ կողմերով օրինակելի սույն այցը մեծապես ծառայելու է նաև այդ նպատակին:
ՀՀ ԿԳ նախարար Արմեն Աշոտյանի այցը դեռ շարունակվում է, մեր տեղեկություններով նա այսօր այցելելու է Վրաստանի Քութայիս քաղաք, ուր հետևելու է ջավախահայ ուսուցիչների վերապատրաստման ընթացքին, որին մասնակցում է նաև ՀՀ ԿԳ նախարարության կողմից գործուղված մասնագետների խումբը»,- նշված է հաղորդագրության մեջ:
Print version
Plain text
Comments (0 posted):
Post your comment