Վրաց իշխանությունները տարհանում են փախստականներին

Նախօրեին Վրաստանի մայրաքաղաքի բարձրահարկ շենքերի մեկի բնակիչներին ոստիկանությունը ստիպել է լքել իրենց բնակարանները: «Грузия Online»-ի փոխանցմամբ, տարհանված բոլոր 700 ընտանիքները փախստականներ են և այստեղ են բնակվել սկսած 1990թ-ի սկզբներից, երբ հակամարտության հետևանքով լքել են Աբխազիան: 

Ոստիկանները տեղափոխում են փախստականների ունեցվածքը ավտոմեքենաներով, թեև բնակիչները բողոքում են, որ տեղ չունեն գնալու: Իրենց հերթին իշխանությունները փաստորեն արդեն նախկին բնակիչներին փոխհատուցում են առաջարկում` 10 հազար ԱՄՆ դոլարի համարժեք կամ բնակարան Վրաստանի շրջաններից մեկում, սակայն փախստականները չեն համաձայնվում լքել մայրաքաղաքը: 

Առաջիկա օրերին փախստականները պատրաստվում են բողոքի ակցիաներ անցկացնել Թբիլիսիի քաղաքապետարանի, ինչպես նաև նախագահի նստավայրի մոտ:

Նույն պարբերականի փոխանցմամբ, վերջին մեկ ամսում սա արդեն երկրորդ դեպքն է, երբ Աբխազիայի փասխստականները հայտնվում են փողոցում: Հուլիսի վերջին իրենց բնակարաններից տարհանված աբխազցիները հայտարարել էին, որ եթե վրաց իշխանությունները չապահովեն իրենց համապատասխան բնակարաններով, նրանք կդիմեն Աբխազիայի իշխանություններին` քաղաքացիություն ստանալու նպատակով:

Ընդհանուր առմամբ Վրաստանում այսօր բնակվում է ավելի քան 200 հազար փախստական: