«Ադոնցի գրածը Տիգրան Մեծի մասին կարող է ճակատագրական դեր ունենալ Տիգրանին նվիրված գրականության համար»
Հայոց տիրակալ Տիգրան Մեծի ծննդյան 2150-ամյակին նվիրված տոնական միջոցառումների շարքում այսօր տեղի ունեցան Նիկողայոց Ադոնցի «Տիգրան Մեծ» աշխատության և Արմեն Մալխասյանի «Տիգրան Մեծ» պատմավեպի շնորհանդեսները:
Պատմական գիտությունների թեկնածու, ԵՊՀ Հայոց պատմության ամբիոնի դոցենտ Պետրոս Հովհաննիսյանը նշեց, որ նման գործիչների հոբելյաններն անհրաժեշտ է նշել համազգային և պետական մակարդակով`անընդհատ վառ պահելու ապրողներիս մեջ նրանց պատգամներն ու ոգին:
Նա հայտնեց, որ Ն. Ադոնցի մեծարժեք ուսումնասիրությունները Տիգրան Մեծի մասին հեղինակի մահվանից հետո 60 տարուց ավել մնացել են անտիպ:
«Այս աշխատությունն Ադոնցը գրել է ֆրանսերեն հատուկ նպատակով` Եվրոպային հայ ժողովրդի անցյալին ծանոթացնելու»,- ասաց նաև հավելեց, որ թեև շատ ժամանակ է անցել Ադոնցի «Տիգրան Մեծը» աշխատությունը գրելու ժամանակներից, սակայն այն բերում է նոր խոսք և չգերազանցված է իր արժեքով:
Պետրոս Հովհաննիսյանը նշեց, որ այն, ինչ գրել է Ն. Ադոնցը Հայոց տիրակալ Տիգրան Մեծի մասին, կարող է ճակատագրական դեր ունենալ Տիգրանին նվիրված գրականության համար, քանի որ այս աշխատությամբ Տիգրանի Մեծի ամբողջ կենսագրությունը, ամբողջ գործունեությունը այլ կերպ է ներկայացվում:
Նա հայտնեց, որ այս աշխատությունը հայտնաբերվել է Ն. Ադոնցի Բեյրութի արխիվում:
Պետրոս Հովհաննիսյանի խոսքով, Ն.Ադոնցը «Տիգրան Մեծ» գրքում ներկայացնում լուսավորյալ թագավորի կերպարը:
«Տիգրան Մեծ» պատմավեպի հեղինակ Արմեն Մալխասյանը նշեց, որ իր աշխատությունը նվիրված է Տիգրան Մեծի գահակալության նախաշրջանին և սկզբնական ժամանակաշրջանին: Նա նշեց, որ այս գրքում ներկայացված է ոչ միայն Տիգրանի կյանքը, այլ նրա շփումները իր շրջապատի մարդկանց հետ, նրա հետաքրքրությունների շրջանակները, ռազմական ունակությունները: Գրքի հեղինակի խոսքով, գրքում ներկայացված հիմնական պատմական իրադարձությունները հիմնված են պատմական փաստերի վրա, սակայն մնացած մանրամասները հորինված են:
Print version
Plain text
Comments (0 posted):
Post your comment