ՀՀ Նախագահին իր հավատարմագրերն է հանձնել Հայաստանում Քուվեյթի նորանշանակ դեսպանը
Նախագահ Սերժ Սարգսյանին այսօր իր հավատարմագրերն է հանձնել Հայաստանի Հանրապետությունում Քուվեյթի Պետության նորանշանակ դեսպան Բասամ Մուհամմադ ալ-Քաբանդինը:
Հանրապետության ղեկավարը շնորհավորել է նորանշանակ դեսպանին պաշտոնն ստանձնելու կապակցությամբ և ընդգծել, որ Հայաստանն անկախացումից ի վեր մեծ նշանակություն է տվել Ծոցի արաբական երկրների հետ հարաբերությունների զարգացմանը: Նախագահի խոսքով, Քուվեյթում Հայաստանի դեսպանության և Հայաստանում Քուվեյթի դեսպանության հիմնումը վկայում են երկու երկրների միջև բոլոր ուղղություններով հարաբերությունների խորացման փոխադարձ ցանկության մասին:
Բասամ Մուհամմադ ալ-Քաբանդինը նշել է, որ իբրև Հայաստանում Քուվեյթի առաջին դեսպան՝ իր երկրի կառավարության կողմից հանձնարարություն ունի ջանքեր գործադրել բոլոր ուղղություններով Հայաստանի հետ զարգացնելու հարաբերությունները:
Զրուցակիցները կարևորել են միջխորհրդարանական կապերի ամրապնդումը, ակտիվ համագործակցությունը միջազգային կառույցների շրջանակում, երկու երկրների միջև տնտեսական, մշակութային և այլ ոլորտներում սերտ փոխգործակցությունը:
Print version
Plain text
Comments (0 posted):
Post your comment