Կարեն Նազարյանը կստանձնի ՄԱԿ-ի Կանոնադրության հատուկ կոմիտեի նախագահությունը
Երեկ ՄԱԿ-ի Արեւելաեվրոպական խումբը հաստատել կազմակերպությունում ՀՀ մշտական ներկայացուցիչ, դեսպան Կարեն Նազարյանի թեկնածությունը` ՄԱԿ-ի Կանոնադրության հատուկ կոմիտեն 2012թ. ընթացքում նախագահելու համար:
Հատուկ կոմիտեն կոչված է քննարկելու կառավարություններից ստացված առաջարկությունները, որոնք ուղղված են կազմակերպության գործունեության եւ նպատակների իրականացման համար կարողությունների ու արդյունավետության բարելավմանը:
Հայաստանին վստահված այս մարմնի իրավասության ներքո են այն հարցերի քննարկումները, որոնք վերաբերում են միջազգային խաղաղության ու անվտանգության պահպանման եւ ապահովման հարցերի շուրջ ՄԱԿ-ի եւ միջազգային կազմակերպությունների դերակատարությանը, Կանոնադրության VII գլխի համաձայն պատժամիջոցների կիրառման արդյունքում վնասներ կրած երրորդ երկրներին աջակցություն ցուցաբերելու հարցում ՄԱԿ-ի Կանոնադրության դրույթների կիրառմանը, պետությունների միջեւ վեճերի խաղաղ կարգավորմանը եւ այլն:
Անցյալում, Հատուկ կոմիտեի աշխատանքի արդյունքում բանակցվել են այնպիսի կարեւորագույն փաստաթղթեր, որոնցից են օրինակ ԳԱ-ի կողմից ընդունված Միջազգային վեճերի խաղաղ կարգավորման, Վեճերի եւ իրավիճակների կանխարգելման ու վերացման, ՄԱԿ-ի եւ տարածաշրջանային կառույցների միջեւ համագործակցության հռչակագրերը, որոնցում մեծապես կարեւորվում է ժողովուրդների ինքնորոշման իրավունքի անվերապահ իրականացումը, վեճերը բացառապես խաղաղ ճանապարհով կարգավորելու, ուժի կիրառման անթույլատրելիությունն ու բացառումը եւ այս առթիվ տարածաշրջանային կազմակերպությունների գործունեության անհրաժեշտությունը:
Ի տարբերություն ՄԱԿ-ի մյուս մարմինների, ՄԱԿ-ի Կանոնադրության հատուկ կոմիտեն իր որոշումներն ընդունում է համընդհանուր համաձայնությամբ:
Print version
Plain text
Comments (0 posted):
Post your comment