ՀՀ միգրացիայի պետական կարգավորման քաղաքականության հայեցակարգի նախագիծը դեկտեմբերին պետք է ներկայացվի կառավարություն
ՀՀ տարածքային կառավարման նախարարին կից կոլեգիայի այսօրվա նիստում ՏԿՆ միգրացիոն պետական ծառայության պետ Գագիկ Եգանյանը ներկայացրել է Հայաստանի Հանրապետության միգրացիայի պետական կարգավորման քաղաքականության հայեցակարգի նախագիծը: Փաստաթուղթն անդրադառնում է ՀՀ միգրացիոն իրավիճակին, միգրացիայի պետական կարգավորման քաղաքականության նպատակին ու սկզբունքներին, միգրացիայի պետական կարգավորման քաղաքականության հիմնախնդիրներին, դրանց լուծման հիմնորոշ ուղղություններին: ՀՀ կառավարության գործունեության ծրագրի համաձայն` փաստաթուղթը դեկտեմբերին պետք է ներկայացվի կառավարություն: Գ. Եգանյանը տեղեկացրել է նաև, որ նախագիծը փորձաքննության կենթարկվի միգրացիայի ոլորտում Եվրամիության ընդունված չափորոշիչներին համապատասխանության տեսակետից: Այս նպատակով կհրավիրվի միջազգային փորձագետ` Եվրամիության TAIEX ծրագրի շրջանակում: Փաստաթուղթն ընդունվել է ի գիտություն և որոշվել ուղարկել շահագրգիռ կազմակերպություններին` առաջարկություններ ստանալու համար: Այս մասին հայտնում են ՀՀ տարածքային կառավարման նախարարության հասարակայնության հետ կապերի բաժնից:
ՀՀ ՏԿՆ աշխատակազմի տեղական ինքնակառավարման վարչության պետ Աշոտ Գիլոյանը ներկայացրել է ՀՀ բազմաբնակարան բնակարանային ֆոնդի կառավարման և շահագործման ոլորտի բարեփոխումների 5-ամյա ծրագրի մշակման նպատակով նախատեսվող աշխատանքները:
Բարեփոխումների ծրագրի մշակման նպատակով ՀՀ վարչապետի որոշմամբ ստեղծվել է միջգերատեսչական աշխատանքային խումբ: Նախատեսվում է ծրագրի նախագիծը ՀՀ կառավարության քննարկմանը ներկայացնել 6 ամիս հետո: Բարեփոխումների ծրագրի մշակման համար աշխատանքային խումբը կհիմնվի արդեն առկա մի շարք փաստաթղթերի վրա, այդ թվում` ՀԲ-ի անկախ փորձագետի կողմից ՀՀ կառավարությանը ներկայացված «Հայաստան. Բազմաբնակարան բնակֆոնդի վերանորոգումը և պաշտպանությունը» առաջարկությունների փաթեթի վրա:
Նշվել է, որ փոխվարչապետի ղեկավարած աշխատանքային խումբը պատրաստ է քննարկել ցանկացած իրատեսական առաջարկություն:
Print version
Plain text
Comments (0 posted):
Post your comment